BOMBO ROXAS – Desidido nga magpasaka sang panumbungon sanday City Councilor Midelo Ocampo kag City Councilor Moreno Gonzaga batuk kay Janice Bacay nga residente sang Barangay Tanque, Roxas City matapos gin-angut sini ang mga pangalan sang duha ka mga konsehal sa sala nga mga alegasyon pinaagi sa iya sini Facebook Post.
Sa interview sang Bombo Radyo Roxas kay Ocampo, ginpanginwala sini nga nagkontra ini sa pagbaton sang gin-donar ni Patrocenio Chiyuto Jr. ukon Don Chiyuto nga ambulansya para sa gobyerno sang syudad.
Ginkatingala ni Ocampo kun ano ang nagtulod kay Bacay agud magpahayag sang wala kamatuuran nga mga tinaga nga sarang makaguba sa dignidad sang iban nga tawo.
Suno sa konsehal nga kun balikan ang tion nga pag-donar sang ambulansya ni Chiyuto sa syudad sang Roxas, ginapatihan nga nag-request si Roxas City Mayor Ronnie Dadivas sa Sangguniang Panlungsod nga tagaan ini sang otoridad nga magbaton sang donasyon gikan kay Chiyuto kun sa diin gilayon man nga gin-aprubahan sang konseho sang syudad bangud kinahanglanon man ini.
Ginapahayag nga bulan sang Seytembre tubtob Oktubre nakaligad nga tuig sang nag-request liwat si Mayor Dadivas sa konseho sang syudad nga pagatun-an sang maayo ang gin-aprubahan nila nga resolusyon sa pagbaton sang ambulansya bangud nakabaton ini sang dokyumento nagikan sa Securities ang Exchange Commission nga wala nakarehistro sa ila si Chiyuto.
Ginklaro sini nga indi pagkontra ang natabo kundi ginplastar kag gintun-an anay ang plano nga pagbaton sang amo nga ambulansya.
Matapos makalab-ot sa atensyon sang duha ka mga konsehal ang pag-angut ni Bacay sa ila, gilayon ang mga ini nga nagpadulong sa Roxas City Police Station agud magpabalhag sang reklamo.
