PANAY, CAPIZ – Ginkakulba sang duha ka mga menor de edad ang gamayan lamang nga pag-kidnap sa ila sa Barangay Tanza, Panay, Capiz pasado alas 7 kagab-i, Disyembre 2.
Sa interview sang Bombo Radyo Roxas kay alyas Toto, nagapang-edaron sang 7 ka tuig, samtang nagahampang ini sa nasambit nga lugar kaupod ang isa pa ka abyan sang hinali lamang nga may nagpundo nga isa ka puti nga van.
Suno kay Toto, gintan-ayan ini sang tsokolate kag kwarta agud mag-upod sa ginabulubanta 10 ka mga kalalakinhan nga sakay sang van.
Ginpahayag pa ni alyas Toto nga nakaptan na ini sang isa ka lalaki apang madasig niya nga ginkagat rason nga madasig ini nga nakapalagyo.
Dugang pa sini, sang ginbuksan ang pirtahan sang van, may nakit-an ini nga isa ka lipong nga bata nga lalaki nga sakay man sang amu nga salakyan.
Magluwas kay alyas Toto, ginkakulba man sang isa ka anum ka tuig nga bata nga babayi ang amu nga insidente.
Suno kay alyas Inday, nag-angkon ini sang samad sa idalum sang mata bangud sa pagdalagan para lamang makapalagyo sa mga luyag magkidnap sa ila.
Plano naman sang amay ni alyas Toto nga ipa-blotter ang natabo agud mangin paandam sa iban nga mga ginikanan nga himuson ang ila nga mga kabataan sa tion sang kagab-ihon.
Mahibaluan nga mga residente sang nasambit nga lugar ang mga biktima.
