PUNTA TABUC ROXAS CITY – Yara na sa listahan sang ila Barangay Anti-Drug Abuse Council (BADAC), ang duha ka persona nga nadakpan sa ginkasa nga drug buy bust operation sa Sitio Railway, Barangay Punta Tabuc, Roxas City.
Mahibaluan nga ginkilala ang mga nagkaladakpan nga sanday alyas Vincent residente sang amu nga lugar kag alyas Carlo nga residente naman sang Barangay Tiza sining syudad.
Nakuha sa paghinakop sang mga ini ang 4 tanan ka sachets sang ginapatihan shabu kag mga drug paraphernalia’s.
Sa interview sang Bombo Radyo kay Punong Barangay Nestor Buenviaje sang amu nga barangay, ginsiling sini nga bangud madamo nga sitio ang iya barangay indi sini niya mahibaluan kun sa diin nagahalin ang mga illegal nga droga.
Suno kay PB Buenviaje, isa sa mga rason nga iya nakit-an kun ngaman nagasulod sa kaangay sini nga buluhaton ang iya nasakupan bangud sa kaimulon.
Mensahe sini sa mga padayon nga nagagamit sang illegal nga droga nga kun mahimo untatan na bangud wala ini sang maayo nga resulta sa kabuhi kag pamilya.
Nagpalab-ot man ini sang pagpasalamat sa katapo sang kapulisan bangud sa ila dedikasyon agud matigayon nga madakpan ang mga indibidwal nga padayon nga nagahimo sang illegal nga buluhaton.
