ROXAS CITY – Pilas ang naangkon sang duha ka indibidwal, matapos ang nagluntad nga aksidente sa Barangy Calitan, Panay, Capiz 11:10 sang aga kahapon Nobyembre 13, 2023.
Ginkilala ang mga nagkalapilasan nga sanday alyas “Elli” 79-anyos kag residente sang Barangay Pili Panay, Capiz kag alyas “Zy” 39-anyos nga residente naman sang Blk 5 lot 26 Sugar maple St., Abilay Norte, Oton, Iloilo.
Sa impormasyon nga nakuha sang Bombo Radyo sa Panay Municipal Police Station, ginapahayag nga samtang ginasubay ni alyas “Elli” ang National Highway sakay sang iya tricycle nga Kawasaki Baja, nagaduag itom padulong kun tani sa Barangay Cabugao Este, Panay Capiz sang aksidente ini nga nabungguan ni alyas “Zy” sakay ang motorsiklo sini nga Honda CRF 150L nagaduag pula kag puti.
Ginapahayag nga nag-overtake si alyas “Zy” rason sang ila pagkatumba.
Bangud sa mabaskog nga impact, nag-angkon sang patal nga pilas sa magkatuhay nga parte sang lawas sanday alyas “Elli” kag alyas “Zy” nga madasig naman gindapatan sang pauna nga pagbulong antes ginpadangat sa ospital.
Sa karun yara sa Roxas Memorial Provincial Hospital si alyas “Elli” naka-confined samtang sa Capiz Doctor’s Hospital naman si alyas “Zy” na-admit para sa nagakaigo nga pagbulong.
