DUMARAO, CAPIZ – Ginpasiguro sang Dumarao Municipal Police Station sa publiko nga preparado sila kag nakabantay sa seguridad para sa pagsaulog sang Padagyaw Festival 2025 sa banwa sang Dumarao .
Sa interview sang Bombo Radyo kay Police Major Tobias Garfin, Hepe sang Dumarao PNP, iya ginpahayag nga may nakaplastar nga rerouting plans agud mangin maayo ang ilig sang trapiko sa ginalauman nga pagdugok sang mga tawo sa nasambit nga selebrasyon.
Suno kay PMAJ Garfin, may mga dalagkuan nga aktibidad halin subong nga Agosto 1 tubtob 5, kalakip ang pagbisita sang isa ka celebrity nga ginalauman dugukon sang mas madamo nga bisita. Bangud sini, ginpasangkad ang seguridad sa bug-os nga banwa.
Dugang pa sang natungdan, gina-secure ang tanan nga entrance kag exit points sang Dumarao. Kaupod ang mobile force company kag mga force multipliers.
Panugyan naman sang kapulisan nga indi magdala sang mga ginadumilian nga butang sa event kasubong sang backpack, matalom nga bagay, kag bottled drinks nga makahulubog bilang kabahin sang preventive measures. Ginaganyat ang publiko nga magsunod sa mga pagsulundan agud malikawan ang anuman nga sahi sang insidente.
Ginaimbitar man ni PMAJ Garfin ang mga pumuluyo kag bisita nga makig-isa kag makisadya sa Padagyaw Festival 2025.
– Interviewed by: Bombo Francis Biñas
