Boluntaryo nga nagpabalhag ang isa ka pumuluyo sa mga kapulisan nga may duwa ka unit sang granada ang nakit-an sa isa ka cell site sa Barangay Ongol Ilaya,Dumarao.
Sandig sa pahayag ni PMAJ. TOBIAS GARFIN, Hepe sang Dumarao MPS, nadiparahan sang isa ka concerned citizen ang duwa ka granada nga nakasulod sa tupperware kag nakaputos sa tela.
Gilayon nga ginpahibali ang mga katapo sang kapulisan sa Dumarao MPS nga gilayon naman nga nagkoordinar sa Provincial EOD Canine Unit (PECU).
Mahibaluan nga ini man ang resulta sa mas ginpasangkad nga kampanya nga Tokhang Kontra Armas-luthang ukon TKAL agud mapabilin ang kalinong kag katawhay sang palibot.
Sa karon, padayon pa ang ginapatigayon nga imbestigasyon sang mga kapulisan sa nakita nga granada kag yara na ini sa paghinakop sang PECU sang Capiz PPO para sa nagakaigo nga disposisyon.
