TAPAZ CAPIZ – Ginkapuhag sang pila ka mga residente ang engkwentro nga natabo sa tunga sang mga katapo sang 12th Infantry Battalion sang Philippine Army kag sang grupo sang New People’s Army (NPA) sa Barangay Apero, Tapaz, Capiz.
Sa interview sang Bombo Radyo kay Colonel Erwin Rommel Lamson, Chief sang Public Affairs Office sang 3rd Infantry Divison (3ID), indi magnubo sa 10 ka remnants sang nabungkag nga Central Front, Komiteng Rehiyon (KR) -Panay kag Regional Sentro de Gravidad ang naka-engkwentro sang puwersa sang estado.
Dugang pa sini, nga naglawig sang kapin tunga sa oras ang engkwentro apang wala naman sang nasamaran ukon napatay sa bahin sang duha ka grupo.
Subong, padayon ang clearing operation sang mga tropa sang 12IB sa encounter site, upod ang hot pursuit operation batok sa nagpalagyo nga rebelde.
Ginpasiguro man ni Lamson nga wala sang nareport nga casualties sa pihak sang 301st Brigade.
Nagpanawagan man si Col. Lamson sa mga pumuluyo nga indi magkahangawa bangud hugot nila nga ginapatuman ang rules of engagement sa mga operasyon agud malikawan ang civilian casualties.
Nagpasalamat man siya sa mga pumuluyo sa pagbulig paagi sa paghatag sang impormasyon sa militar, kag ginapanawagan man niya nga ang nabilin pa nga mga rebelde magsurender na agud mamintinar ang kalinong kag katawhay sa bilog man nga probinsya sang Capiz.
