ROXAS CITY, CAPIZ – Tuman ang pagpasalamat ni Former Capiz Governor Esteban Evan “Nonoy” Contreras matapos ginbasura sang Sandiganbayan Fourth Division ang iya kaso kriminal.
Sa interview sang Bombo Radyo Roxas kay Contreras, iya ginpahayag nga nagapasalamat ini una sa tanan sa makaako bangud napamatian ang iya madugay na nga ginapangamuyo kag naguwa na ang kamatuuran.
Aminado ang anay gobernador nga daku ang epekto sang kaso sa iya pamilya, apang nagalaum ini subong nga nahatagan na sang kasanagan ang palamangkutanon sang publiko kag natinluan ang iya pangalan.
Suno kay Contreras, wala sang bastante nga basehan ang mga akusasyon nga ginhaboy batuk sa iya, kay former Capiz Administrator Edwin C. Monares, kag kay former Roxas Memorial Provincial Hospital (RMPH) Chief of Hospital–OIC Dr. Edmarie Tormon.
Dugang pa sang natungdan, ang desisyon sang Fourth Division sang Sandiganbayan ang pamatuod nga malimpyo ang iya nga tinutuyo sadtong panahon sang iya nga pagpungko bilang gobernador.
Matandaan nga sadtong Nobyembre 24, 2021, ginpasakaan sang reklamo sanday Contreras, Monares, kag Tormon sang Sangguniang Panlalawigan, nga ginpangunahan nanday Vice Governor Jaime Magbanua kag mga Board Membero nga sanday Jonathan B. Besa, Enrique V. Martin, Mateo C. Hachuela, Elmer P. Arevalo, Thea Faith T. Reyes, Weldie C. Apolinario, Jr., Mitchelle John B. Patricio, kag Renzo T. Teves.
Ang reklamo may kaangtanan sa ginaalegar paglapas sa Republic Act 3019 ukon Anti-Graft and Corrupt Practices Act, Republic Act 9184 ukon Government Procurement Reform Act, kag Malversation of Public Funds or Property sa idalom sang Revised Penal Code.
Sa subong, plano ni Former Capiz Governor Esteban Evan “Nonoy” Contreras nga i-focus ang iya oras sa iya kaugalingon, negosyo kag pamilya matapos ibasura sang Sandiganbayan ang kaso batuk sa iya.
– Interviewed by: Bombo Lynd-C Bade
