Ginpanindugan sang Department of Foreign Affairs (DFA) nga sarang sa gihapon mabuligan sang pungsod si Former Presidente Rodrigo Duterte kag ang iya pamilya bilang mga Pilipino.
Gin-athag ni DFA Undersecretary Eduardo de Vega nga sang gindala ang anay presidente sa The Hague, Netherlands, ginpabilin sini ang iya pagka-Pilipino, kag may kinamatarong ini sa gihapon sa anuman nga bulig nga mahimo mahatag sang DFA.
Sang ginpamangkot kon si anay Pang. Rodrigo Duterte mahimo nga magsumpa sa Embahada sang Pilipinas sa The Hague, Netherlands, ginpahayag ni De Vega nga mahimo ini sang embahada bangud nagaserbe nga extension sang gobyerno sang Pilipinas ang nasambit nga talatapan.
Apang suno sa iya, mangin daku sa gihapon nga question mark kun pahanugutan sang International Criminal Court (ICC) ang anay presidente nga maghalin kag magbiyahe pakadto sa embahada agud magsumpa bilang bag-o napilian nga alkalde sang Davao City, ilabi na nga indi na katapo sang ICC ang Pilipinas.
Gintumod sang opisyal sang DFA ang legal theory nga ang gahum kag awtoridad sang embahada ang limitado sa lugar sang embahada.
Nagakahulugan ini nga dapat dal-on sa embahada sang Pilipinas si Duterte agud magsumpa sa pwesto.
Madumduman nga liwat nga nag-angkon sang landslide win ang anay presidente matapos magpadalagan sa pagka-alkalde sang Davao City. Ini sa pihak sang iya pagkapreso sa ICC detention facility sa putukputukan sang kampanya tubtub sa eleksyon.
Samtang lunsay yara sa The Hague ang embahada sang Pilipinas kag headquarters sang ICC.
