Nagtakop na ang kampanya sang Gilas Pilipinas sa FIBA Asia Cup 2025 matapos ginlutos sang Australia sa score nga 84-60.
Sa imbukada pa lang nga quarter sa hampang sa King Abdullah Sports City sa Jeddah, Saudi Arabia, gina-uyatan na sang Boomers ang 29-12 nga abanse batok sa Philippine national team.
Gindepensahan man sang world number 7 si Justin Brownlee gani nabudlayan ini nga maka-score.
Gintinguhaan pa sang Gilas Pilipinas nga makalab-ot apang nabudlayan kag indi makatupong sa two-time defending champion.
Ini na ang ikatlo nga kahigayunan nga napaslawan ang Gilas Pilipinas nga makasulod sa semifinals sang FIBA Asia Cup matapos ang asud-asod nga runner-up sini sang 2013 sa Manila kag 2015 sa Changsha, China.
Daku man nga pagpanghangkat para sa Gilas ang wala paghamapang nanday Calvin Oftana kag Cjay Perez bangud sa pilas sa buko-buko nga naangkon sa mga nakaligad nga hampang.
Nasayang ang 17 puntos ni Kevin Quiambao, 15 puntos si Dwight Ramos kag 10 puntos si Brownlee.
Sunod nga makit-an ang Gilas sa 2027 World Cup Qualifiers nga maga-umpisa sa Nobyembre 2025.
