Ginpahayag ni Senate President Chiz Escudero nga indi dapat kahadlukan kag kahangaw-an ang gin-file nga petisyon ni former Executive Secretary Vic Rodriguez kag Davao City Rep. Isidro Ungab sa Korte Suprema batuk sa 2025 national budget.
Para kay Escudero, welcome sa iya ang mga petisyon nga nagakwestyon sa anuman nga kasuguan nga ginapasa sang Kongreso.
Suno pa kay Escudero nga oportunidad ini agud makapasakop sa proseso sang budget kag pareho sa executive kag legislative, makit-an man sa karon ang mangin papel sang judicial branch.
Pahayag pa sini nga ang gin-file nga petisyon batuk sa P6.326 trillion 2025 national budget ang indi dapat kahadlukan kag kahangaw-an bangud kabahin ini sang isa ka mabakod nga demokrasya sa pungsod para sa anuman nga layi kalakip na ang pangpungsudnon nga pondo.
Dugang pa ni Escudero nga dapat lamang nga ginaatubang ini kag sabton sang mga opisyal sang gobyerno kag kun sa ulihi nga indi magkasugot, korte na ang magadesisyon kun sin-o ang insakto ukon may sala kag sin-o ang may kakulangan.
Liwat man nga nanindugan ang lider sang Senado nga wala sang blangko kag kulang sa 2025 General Appropriations Act kag mas magapangibabaw ang enrolled bill apisar pa may makit-an nga kinalain diri sa Bicameral Conference Committee report.
