Wala na sang kabuhi ang ginapahayag nga isa ka miyembro sang LGBTQ matapos ginluthang-patay sa Barangay Gabuan, Roxas City.
Ginkilala ang biktima kay alyas “Rina”, yara sa legal nga pang-edaron kag residente sang Brgy. Mongpong sa sini nga syudad.
Base sa nakuha nga impormasyon sang Bombo Radyo sa lugar, nagikan ang biktima sa isa ka mall sa syudad sang Roxas kag nagsakay ini sa tricycle kag papuli na kun tani sa ila.
Apang, pag-abot sa Hemingway street nakabati na ini sang lupok sang armas. Pag-abot sa nasambit nga lugar nga kun sa diin natabo ang insidente, ginpaarakan na ini sang apat ka lupok sang armas-luthang nga gintunaan sang iya kamatayon.
Madasig naman nga nagpalagyo ang driver sang tricycle nga ginsakyan sang biktima bangud sa kakulba kag nagpanago ini sa kakahuyan kag sang nakita nga madamo na sang tawo sa palibot, didto na ini nagguwa.
Samtang, madasig naman nga nakapalagyo ang mga suspetsado nga sakay sang isa motorsiklo.
Sa karon, padayon pa ang imbistigasyon sang mga katapo sang Roxas City PNP angut sa nasambit nga insidente.
