PONTEVEDRA, CAPIZ – Malipayon kag tuman ka proud ang ginikanan sang isa ka atleta nagikan sa Capiz nga nangin madinalag-on sa Palarong Pambansa 2025 nga ginapatigayon sa Laoag City, Ilocos Norte.
Ang madinalag-on nga atleta nga nakakuha sang Gold Medal sa 100m Hurdle (Secondary Girls) sa Palarong Pambansa 2025, amu si Angel Villagracia, estudyante sa Capiz National High School, 3rd time gold-medalist, subang sa tatlo ka mag-ulutod, tiglawas sang probinsya sang Capiz sa idalom sang Western Visayas Regional Athletic Association (WVRAA) kag tumandok sang Barangay Solo, Pontevedra, Capiz.
Sa interview sang Bombo Radyo sa ginikanan ni Angel nga sanday Nanay Josephine Villagracia kag Tatay Albert Villagracia Jr, ginapahayag nga tuman gid sila ka proud sa ila nga subang sa kadalag-an kag kalipay nga ginahatag sini para sa ila.
Apisar nga kulang man sila sa pinansyal kag kun kaisa ginakulabos sa pila pa ka mga kinahanglanon, wala naga-untat sa pagtuman sang iya sini nga handom ang ila nga subong kun sa diin sa karon nagkuha naman ini sang ika-tatlo nya nga bulawan nga medalya sa Palarong Pambansa.
Dugang pa sang mga ini, todo suporta man ang ila sini ginahatag sa ila sini nga bata sa pagbulig nga malab-ot ang handom sini nga mahaw-as sila sa kapigaduhon – “ang tanan nga handom ni Angel, amu ang mahaw-as sa kapigaduhon ang amon nga kabuhi” pahayag ni Nanay Josephine.
Nahibaluan nga si Angel ang sa karon naka-record sang 14.54 segundos sa ginpasakupan sini nga isport.
Sa pihak nga bahin, ginapangamuyo sang ginikanan sini ang ikaayong lawas kag ginapangabay nga permi lang yara sa maayos nga sitwasyon kag malab-ot ang tanan nga handom sa kabuhi.
Mensahe sang ginikanan ni Angel, padayon sila magasuporta sa handom sang ila bata kag indi sila maga-untat nga mag alalay sa abot sang ila masarangan sa mga kinahanglanon ni Angel pag abot sa iya sini nga handom.
