SIGMA, CAPIZ – Gintambongan sang mga residente sang Barangay Malapad Cogon kag Parian, Sigma ang ginpatigayon nga public hearing sang Committee on Environment sang Sangguniang Panlalawigan sa Barangay Malapad Cogon, Sigma, Capiz.
Ini ang ginkumpirma ni Board Member Atty. Matthew Hachuela, chairman sang Committee on Environment sang Sangguniang Panlalawigan sang ma-interview sang Bombo Radyo.
Ang nasambit nga sinapol ginpangunahan sang mga board members kalakip na sanday Wildie Apolinario, Matthew Hachuela, Elmer Arevalo kag Jonathan Besa kag mga government agencies nagikan sa EMGB, CAPENRO, DENR-PENRO subong man ang nagserbi nga representante sang quarry operator.
Mahibaluan nga ginpatigayon ang public hearing sa Barangay Malapad Cogon bangud nagpamalibad ang punong barangay sang Barangay Parian matapos nga nagpadala sang public hearing notice.
Ginpahayag naman ni Hachuela nga tuman ka damo nga mga residente ang nagtambong naggikan sa Sitio Katamnan, Barangay Parian bangud sa ila lugar ang tuman ka apektado.
Gilayon naman nga gintsekyar sang mga board members ang sitwasyon sa Sitio Katamnan, Barangay Parian Sigma, sa diin nakita-an nila nga yara gid sa tiilan sang bukid ginapatigayon ang quarry operation.
Nagapati naman si Hachuela nga may lapses ang mga government agencies kag CAPENRO bangud sa mga kakulangan nga requirements nga wala na-comply sang quarry operator.
Mahibaluan nga temporaryo ginpauntat ang quarry operation matapos nag-issue sang cease and desist order si Governor Esteban Evan Nonoy Contreras.
Gin-athag naman ni Hachuela nga indi mahimo nga makapatigayon sang quarry operation sa tion nga indi ma-comply ang mga requirements.
Samtang, luyag naman sang mga residente nga untatot na lamang ang operasyon sang quarry sa ila lugar.
Sa karon, ginpakamaayo na lamang sang Committee on Environment nga mag-ubra sang committee report kag magsumiter sang resolusyon natuhoy sa reklamo sang mga residente.
