ROXAS CITY, CAPIZ – Liwat nga ginapanawagan sang General Alliance of Workers Association (GAWA) sa Western Visayas kay President Ferdinand Marcos Jr. nga padasigon ang pagpatuman sang hagna nga ₱200 nga dugang-sweldo, nga suno sa ila madugay na dapat nga napatuman kag importante para sa pangabuhi sang mga mamumugon.
Sa interview sang Bombo Radyo Roxas kay Wennie Sancho, Secretary-General sang General Alliance of Workers Association, ginhatagan-pagtamod sini nga padayon nga nagapangatubang ang madamo nga mamumugon sa tuman nga kapigaduhon tuga sang padayon nga pagtaas sang mga balaklon.
Suno kay Sancho, ang pag-atrasar sa pagpatuman sang dugang sa sweldo ang labi lamang nga magapalala sa kapigaduhon kag magaduso sa mga mamumugon sa mas madalom nga pagkautang.
Samtang ginakilala man nila ang concern sang gobyerno sa posibilidad sang pagkadula sang trabaho, ginpahayag sang General Alliance of Workers Association nga indi dapat isakripisyo ang welfare sang mga workers. Imbes nga ipaiwayang dugang nga sweldo, ginsuhestyon sang grupo nga suportahan sang gobyerno ang mga maapektuhan nga negosyo pinaagi sa subsidiya ukon mga insentibo nga buwis.
Dugang pa sang natungdan nga ang mga mamumugon indi lamang basta numeroi sa estatistika—sila ang mga indibidwal nga may pamilya, responsibilidad sa galastuson, kag mga handom sa grupo. Suno sa grupo, ang dugang nga sweldo ang indi lang nahanungod sa numero; ini ang simbolo sang dignidad, respeto, kag makatarungan nga kabayaran para sa labor-force nga nagapahulag sa ekonomiya sang pungsod.
Ginahaylo sang General Alliance of Workers Association ang Presidente nga ikonsidera ang adlaw-adlaw nga pangabudlay sang ordinary nga mamumugon, apisar haligi sang pungsudnon nga pag-uswag, apang masami nga nagakabilin pag-abot sa mga benepisyo sang pagsanyog sang ekonomiya.
Suno sa grupo, ang dugang-sweldo indi lamang magapaayo sa kabuhi sang mga mamumugo kundi magapabaskog man sa paggastos sang mga bumalakal nga magaamot sa mas malapad nga pag-uswag sang ekonomiya.
Nagalaom ang alyansa sang mga mamumugon nga malakip sa State of the Nation Address ni President Ferdinand Marcos Jr kag hatagan sang prayoridad sang administrasyon ang ini nga isyu, indi lamang bilang isa ka desisyon pang-ekonomiya kundi bilang isa ka isyu sang pangkomunidad nga kinamatarong kag dungog sang tawo.
