ROXAS CITY, CAPIZ- Pasado na sa 3rd and Final Reading sang Kamara ang House Bill 6428 ukon ang ‘An Act Providing for the inclusion of the Regular Campuses of the Capiz State University into its University Charter sa ginpatigayon nga regular session sang House of the Representatives sang Disyembre 16, 2025.
Sa interview sang Bombo Radyo kay Dr. Efren Linan, University President sang Capiz State University (CapSU), iya ginpahayag nga dako gid nga bulig ang pagpapasa sang amo nga hagna para sa kaayuhan sang operasyon kag serbisyo sang unibersidad.
Suno kay Linan, bangud sa naga-implementar sila sa subong sang Revised Organization Structure (ROS), may isa ka ginakinahanglan ang Department of Budget and Management (DBM) pag-abot sa pag-alokar sang pondo sa nasambit nga lihok sang CapSU.
Isa sa pinaka-kinahanglan sang DBM amo ang pagkilala sang tanan nga campuses sang CapSU bilang unibersidad rason nga natukod ang amo nga hagna kag ginkaluy-an nga nakapasar sa Kongreso.
Pahayag niya, bangud nga may yara lamang sang tatlo ka campuses ang ginakilala bilang university charter rason nga nagakabudlayan man sila sa pag-implementar sang Revised Organization Chart.
Nahibaluan nga ang una nga nagpasa sang hagna amo si Capiz 2nd District Representative Jane Castro sang 19th congress apang wala magmadinalag-on rason nga gin-refile nya ini liwat subong nga 20th congress sa diin naghatag man sang suporta si Capiz 1st District Representative Howard Guintu nga nagfile man sang kapareho nga hagna.
Ang Capiz State University ang nagaisahanon nga pampubliko nga Unibersidad sa Capiz sa diin ang mga campuses sini ang nahamtang sa Roxas City (Main Campus), Dayao, Pontevedra, Pilar, Tapaz, Dumarao, Sigma, Poblacion Mambusao, Burias Mambusao kag Sapian.
Nagpasalamat naman ang natungdan sa duha ka mga representatives sa amo nga lihok kag ginalauman nga matigayon ini nga makapasar sa Senado agud nga maimplementar na sang maayo ang tanan nga lihok para sa ikaayo sang unibersidad.
Interviewed by Bombo Sunnie Mae Constantino Batencila
