ROXAS CITY – Ginkatingala sang mga pumuluyo sang National Housing Authority (NHA) sa Poblacion Ilaya, Panay, Capiz ang pagsarado sang pila ka mga housing unit.
Sa interview sang Bombo Radyo sa indi na paghingadlan nga residente sang amu nga lugar, suno diri ginsiraduhan kag ginpaskilan sang notice ang mga unit nga wala sang may naga-istar kag abandonado.
Pahayag pa sini, nga ang pag-ekis sa mga unit ang isa ka pahibalo nga ini ang ginkustodiya sang Local Government Unit (LGU) kag NHA sa nasambit nga banwa.
Samtang, sa separado nga interview kay Punong Barangay Alexander Bigcas ginkumpirmar sini nga nagpalab-ot na sang reklamo ang apektado nga mga pumuluyo bangud gulpi sila nadulaan sang panimlay kag wala man lang sang abiso nagikan sa LGU.
Dugang pa sini, nga ang iban nga mga ginpangsiraduhan nga mga balay ang may naga-istar pa apang natabuan lang nga wala ini sa ila puluy-an, bangud ang iban ang nagatrabaho kag may importante lang nga ginpadulongan.
Ginasiguro naman ni Bigcas, nga mahatagan sang klaruhan ang natabo.
