ROXAS CITY – Isa ka daku nga palamangkutanon sa karon sa mga netizens ang nangin Instagram post sang actress-dancer nga si Ella Cruz kasunod sang iya nga pagbisita sa probinsiya sang Capiz.
Sa nasambit nga post sang aktres nga may caption, “finally leaving this place! Thank you, Lord. . .”, makit-an nga sakay ini sa eroplano pabalik sa Metro Manila.
Kasunod sini, madamo sang nangin reaksiyon ang mga fans ilabi na ang mga Capizeño bangud sa hashtag sang aktres nga #WorstExperienceEver.
Gilayon naman ini nga ginsegundahan sang isa pa ka post sang aktres nga nagapahayag nga indi ang iya mga Capizeño fans ang rason sang iya nangin ‘worst’ nga pagbisita sa probinsiya.
Nagpangayo man ini sang pasaylo bangud wala niya naathag ang rason sang iya una nga Instagram post.
Naga-apelar sa karon sa mga netizens ang aktres nga indi siya pag-i-bash bangud gid lamang sini.
Nahibaluan nga nagbisita ang aktres sa banwa sang Mambusao, Capiz kaupod ang teen star nga si Gab Lagman para sa Talent Night sang Mr. and Ms. Inilusan 2018.
