Patay ang isa ka indibidwal samtang tatlo naman ang pilason matapos maglapaw ang salakyan nga pick-up sa karsadahon sang Sitio Riles, Barangay Dulangan, Pilar, Capiz.
Ang napatay amo si alyas “lito” isa ka mangunguma kag residente sang Barangay Olalo, Pilar, Capiz.
Samtang ang mga pilason naman amo sanday alyas “Toto” 62-anyos, driver sang top-down, residente sang Barangay Dulangan, Pilar Capiz, kag si alyas “Ruel” driver sang pick-up kag kaupod niya nga pasahero nga si alyas “Earl” isa ka foreign national, lunsay mga residente sang Barangay Daculan, Estancia, Iloilo.
Sa interview sang Bombo Radyo kay Police Staff Sargeant Jay Pee Tomogda, imbestigador sang Pilar Municipal Police Station, iya ginpahayag nga halin sa Roxas City ang salakyan nga pick-up kag padulong kuntani sa Estancia, Iloilo apang pag-abot sa lugar hinali nga nasalapay sini ang top-down nga tricycle rason nga naglapaw ini sa karsadahon kag nadalahig pagid ang isa ka persona nga nagalakat sa dalan.
Suno kay Tomogda, nagdiretso ang pick-up sa isa ka balay nga yara sa idalom nga bahin kag bumunggo sa puno sang mangga.
Gilayon naman nga nagresponde ang mga rescuer sa lugar kag gindala sa ospital ang mga biktima apang gindeklara nga dead on arrival si alyas “lito”.
Sa subong, padayon pa ang imbestigasyon sang mga kapulisan sa insidente kag ginahulat ang pamilya sang napatay kon magapasaka ini sang nagakaigo nga kaso sa driver sang pick-up.
