ROXAS CITY – Patay ang isa ka lupon member sang Barangay Canapian, Maayon, Capiz matapos ginluthang sang wala pa matumod nga persona.
Ginkilala ang biktima nga si Freddie Doce, yara sa legal nga edad, sang nasambit nga lugar.
Suno kay JR Talabador nga nakabati ini sang una nga tatlo ka lupok kag sang makaligad ang pila ka minutos nakabati naman ini sang dugang nga duha ka lupok rason nga nagguwa ini sa balay para lantawon ang natabo.
Nakita na lamang sini ang biktima nga nagapungko kag nagapangayo sang tabang rason nga iya ini ginbuligan.
Gilayon nga gindala sa Bailan District Hospital ang biktima samtang ginrefer ini sa Roxas Memorial Provincial Hospital bangud sa mga patal nga pilas nga naangkon ni Doce.
Ginpahayag ni Talabador nga wala man ini sang kontra ang biktima sa ila nga lugar.
Ginbawian naman sang kabuhi ang biktima samtang ginabulong sa ospital.
