Nadakpan sang kapulisan ang isa sa pito ka mga suspetsado nga involved sa pagpangawat sang bag ni Commission on Elections (COMELEC) Chairman George Erwin Garcia sa isa ka restaurant sa Pasay City sang Martes sang hapon.
Suno kay Pasay City Police Chief Col. Joselito De Sesto, isa ka babaye nga gina-alegar lider sang grupo ang na-track down kag nadakpan sa ginpatigayon nga follow-up operation sa Bacoor, Cavite.
Narekober man sang mga otoridad ang bag sang COMELEC Chief nga may unod nga pila ka mga personal nga gamit kaangay sang cellphone kag mga ID, apang wala na ang kwarta nga yara sa sulod.
Padayon ang pagpangita sa anum pa ka mga kaupod nga kabahin sang grupo, nga suno sa kapulisan madugay na nga nagalibot sa Metro Manila kag kaiping nga mga probinsya gamit ang amo man nga modus.
Dugang pa ni De Sesto, una na nga napreso ang mga suspetsado bangud sa nagkalain-lain nga kaso sang pagpangawat apang sulit-sulit nga nagbalik sa iligal nga aktibidad.
