ROXAS CITY-Nagpatigayon sang sinapol si Capiz Governor Esteban Evan Nonoy Contreras natuhoy sa padayon nga pagtimbuok sang COVID-19 cases sa probinsiya kag kakulangan sang mga medical frontliners sa Roxas Memorial Provincial Hospital (RMPH).
Sa nasambit nga sinapol, ginpresentar nga may yara na sang 33 ka mga COVID-19 patients nga naka-admit sa covid ward sang nasambit nga ospital apang kulang ang mga medical frontliners nga naga-amuma sa mga pasyente bangod ang kadam-an sini sa ila ang ginpaidalom sa quarantine matapos nga nagpositibo sa amo nga sakit.
Ginduso sa nasambit nga sinapol nga maga-augment ang mga medical staff nga yara sa mga district hospitals apang ginpamalabagan ini ni Dr. Ramon Alex Nolasco, ang head sang Hospital Management Services sang probinsiya.
Ginpahayag ni Nolasco nga ginakulang man sang mga medical staff ang mga district hospitals kag tunaan sang pagkaparalisa sang operasyon sang mga nasambit nga ospital sa tion nga buhin ang mga medical staff.
Ginatun-an man karon sang probinsiya ang pagdugang sang isolation facility ukon bed capacity sa mga district hospitals agud maka-akomodar sang mga asymptomatic kag suspect cases samtang nagahulat sang resulta sang RT-PCR test.
Samtang ginalauman naman sang probinsiya ang pag-abot sang mga walo ka mga nurses gikan sa Department of Health-Region 6.
Kabahin sa nasambit nga sinapol amo ang mga stakeholders, Capiz Medical Sociey, lokal nga gobyerno sang siyudad kag DOH-Region 6.
