ROXAS CITY – Ginkompirmar sang punong barangay sang Barangay Baybay, Roxas City nga nagaserbi nga quarantine facility sang gobyerno sang siyudad ang isa ka motel sa Altavas Subdivision sa nasambit nga barangay.
Suno kay Punong Barangay Reynaldo Magallanes, gin-akuparan sang Roxas City government ang amo nga pasilidad agud pahamtangan sang mga nagpalauli nga Locally-Stranded Individuals (LSI’s) kag Returning Overseas Filipinos (ROF’s) nga mga residente sang siyudad.
Ginpahayag ni Magallanes nga nagsugod ini nga mangin quarantine facility sadtong Hulyo 17.
Sa karon suno sa opisyal may kapin 16 ka mga indibidwal nga naka-quarantine sa amo nga pasilidad.
Ginklaro man ni Magallanes nga lunsay halin sa gobyerno sang siyudad ang mga frontliners nga yara sa amo nga lugar kag nagabulig lamang ang konseho sang barangay pinaagi sa pagpahamtang sang mga Barangay Peacekeeping Action Team (BPAT) member.
Hugot man suno diri ang seguridad kag wala gid ginapahanugutan nga magguwa ang mga naka-quarantine kag wala man ginapasudlan sang ila pamilya ang amo nga pasilidad.
Ginklaro man ni Magallanes nga ang mga naka-quarantine sa nasambit nga pasilidad ang indi lamang residente sang Barangay Baybay.
