DUMARAO, CAPIZ – May ara na sang person of interest ang Dumarao Municipal Police Station sa pagpangluthang sa duha ka lalaki sa Barangay Agsirab, Dumarao, Capiz sa diin nagresulta sa kamatayon sang isa ka biktima kag isa ang napilasan.
Matandaan nga ang biktima nga napatay amo si alyas ‘Regie’, 35-anyos samtang ang pilason naman nga biktima amo si alyas ‘Rommel’, 43-anyos nga lunsay mga residente sang nasambit nga lugar.
Sa imbestigasyon sang kapulisan, ginpahayag nga nagatindog sa higad sang karsada ang mga biktima sang hinali nalang ini nga ginpangluthang sang makapila ka beses sang wala pa makilan-an nga mga suspek.
Bangud sa natabo, nag-angkon sang pilas sa tuo nga dughan kag abaga si alyas ‘Regie’ nga amo ang gintunaan sang iya nga kamatayon.
Samtang pilas naman sa liog ang naangkon ni alyas ‘Rommel’ nga gilayon nga gindala sang Dumarao Emergency Response Team sa Dao District Hospital, apang sang ulihi gin-transfer ini sa Western Visayas Medical Center, Mandurriao, Iloilo City para sa nagakaigo nga pagbulong.
Narekober sa lugar ang isa ka unit sang cellphone, P300 nga balor sang kwarta, tatlo ka basiyo sang bala sang calibre .45 nga armas-luthang, kag isa ka deformed slug.
Sa karon, padayon pa nga ginabulong ang isa sa mga biktima kag desidido naman ang pamilya nga magpasaka sang kaso batuk sa suspek.
– With a report from Bombo Jessa Delos Santos
