SAPIAN CAPIZ – Magapangatubang sa kaso nga Homicide, ang suspek sa pagpatay sa senior citizen nga babaye sa Sitio Bulon Barangay Bilao, Sapian, Capiz.
Ini ang ginpahayag sang hepe sang Sapian Municipal Police Station nga si Police Captain Christine G. Cerbo sang mainterview sang Bombo Radyo.
Suno kay Cerbo, natigayon nga madakpan ang suspek nga si alyas Drigo, 25-anyos kag residente sang nasambit nga lugar sa Brgy. Man-op, Altavas, Aklan sadtong Nobyembre 19, 2024, matapos ginserbihan sang warrant of arrest sang mga otoridad.
Matandaan nga ini ang ginatudlo nga naglampos-patay sa 71-anyos sini nga tiya nga ginkilala kay Dionela Doroteo matapos nasapwan nga wala na sang kabuhi ang tigulang sa iya puluy-an kag duguon bangud sa naangkon nga patal nga pilas sa ulo.
Pahayag sang hepe nga nagpadulong sa iya himata ang suspek agud kun tani magpangita sang trabaho.
Sa karun, nagapabilin ini sa kustodiya sang Sapian MPS para sa nagakaigo nga disposisyon.
