ROXAS CITY — Kaso nga murder ang mahimo pangatubangon ni Jerwin Telesforo sang Barangay Poblacion, Sapian, Capiz bangud sa pagpatay sini sa iya live-in partner nga si Loida Cordovero sang Barangay Lonoy sining siyudad.
Suno kay PSI Efren Yu-ing, deputy chief of police sang Roxas City PNP, nagaguha sa ila imbestigasyon nga gintuyo ni Telesforo nga patyon si Cordovero kag taguon ang bangkay sini.
Mahibaluan nga nasapwan na lamang ang hublas nga lawas ni Cordovero nga nakasulod sa sako sa idalum sang kama sa sulod sang Room 31 sa Beehive Inn sa Plaridel St. sining siyudad.
Ini matapos nga may nagpalab-ot man sang impormasyon sa pulisya may kaangtanan sa amo nga insidente sa sulod sang lodging house sang Dominggo nga adlaw.
Ginatinguhaan man sang pulisya nga matipon ang kinahanglanon nga mga testimoniya sang mga testigo kag iban pa nga dokumento agud mapasaka ang reklamo batuk kay Telesforo sa Roxas City Prosecutor’s Office subong nga adlaw.
Si Telesforo ang boluntaryo man nga nagsungka sa Sapian PNP kag gintuad nga siya ang nagpatay sa iya live-in partner.
Samtang, base sa resulta sang autopsy examination sang PNP – Scene of the Crime Operatives, pagkakuga ang ginkamatay sang biktima.
May nakita man nga madamo nga lagub sa magkatuhay nga bahin sang iya lawas nga nagapatimaan nga ginkastigo anay ini sang suspek antes ginpatay.
Nahibaluan man nga may duha na ka mga kabataan si Telesforo kag Cordovero apang ginpabulag sila sang mga himata sang babaye bangud sa alegar masami sini nga pagsakit sa biktima magluwas nga nagagamit pa ini suno sa ila sang iligal nga droga.
