Gin-akusaran sang unfair labor practices ang isa ka kompanya sa China matapos ginhalin sa suok nga bukid ang ila nga opisina agud mapilitan nga mag-resign ang mga empleyado.
Nakibot ang mga empleyado sang isa nga wala na ginhingadlan nga advertising agency sa Xi’an City, Shanxi Province matapos sini gin-anunsiyo nga ibalhin na sa kabukiran ang ila nga opisina.
Ang bag-o nga lokasyon sang opisina ginpahamtang sa Qinling Mountains, tatlo ka oras ang kalayu-on halin sa Xi’an City. Magluwas sa tuman ka layo, limitado ang public transportation nga mahimo masakyan pakadto didto. Pag wala sang sadiri nga salakyan, kinahanglanon pa nga magsakay sa bus nga tatlo ka beses lang nagabyahe sa isa ka adlaw. Pagpanaog sang bus, kinahanglan pa nga maglakat sang tatlo ka kilometro padulong sa opisina.
Sa pila ka adlaw nga pag-opisina sang mga empleyado, natukiban nila nga kulang sa basic amenities ang opisina kag kinahanglan pa magkadto sa mga kaiping nga banwa agud makagamit sang maayos nga banyo ang mga babaye. Madamo man sang mga mabangis nga mga layaw nga ido kag delikado nga maglakat sa gab-i.
Wala nagdugay ang kadam-an kag nag-resign ang 14 sa 20 sini nga mga empleyado. Apat ka adlaw pagkatapos mag-resign ang 14 ka mga empleyado, gilayon nga ginbalik sang ad agency ang opisina sa Xi’an City kag nagpangita na sila sang bag-o nga empleyado.
Suno sa isa sa mga empleyado nga nag-resign, ginhungod nga ginbalhin sa masuok nga lugar ang opisina mag-resign kag makatipid sa paghatag sang severance pay.
Nag-viral ang amo nga hitabo nga ini sa mga Chinese netizens kag ginganyat nga mag-file sang kaso ang anay nga mga empleyado. Sa karon, ginahulat pa kun magdemanda ang mga ini.
