ROXAS CITY -Mahimo na nga masuguran sa masunod nga semana sang G-Arabia Platinum Construction and Development Company ang konstruksyon sa nauntat sini nga pagpakaayo sang dalan sa San Roque Street, Barangay Inzo Arnaldo, Roxas City.
Kasunod ini sang ginkasugtan sa ginpatawag nga committee meeting sang chairman sang Committee on Infrastructure sang Sangguniang Panlungsod nga si City Councilor John Paul Arcenas.
Base sa interview sang Bombo Radyo kay Arcenas ginpahayag sini, nga ginpasalig sang nasambit nga contractor nga magasunod sa mga gina-require sandig sa City Ordinance No. 046-2016 kalakip na ang pagpahamtang sang mga early warning devices.
Gindugang pa sini nga nag-issue na sang Certificate of Completion ang Department of Public Works and Highways ukon DPWH-Capiz 1st Engineering District nga nagapamatuod nga natapos na sang nasambit nga contractor ang ginakaayo nga dalan sa Barangay Dayao kag Culasi sining siyudad.
Bangud diri, mahimo na nga hatagan sang construction permit ang nasambit nga contractor agud masuguran na ang pagpakaayo sa nasambit nga dalan.
Natalana naman nga magpapasar sang resolusyon ang Sangguniang Panlungsod sa masunod nga session agud mahatagan na sang construction permit ang nasambit nga contractor.
