ROXAS CITY – Nagapabilin sa ospital sa Iloilo kag kritikal ang kondisyon sang lalaki nga biktima nga ginluthang sang Barangay Tanod sa Pinesville, Brgy. Bato, Roxas City.
Matandaan nga ginkilala ang biktima kay alyas Jan-Jan, yara sa legal nga pang-edaron samtang ang ginatudlo nga suspek amo si Manuel Oñas Ferrer, 52-anyos, Barangay Tanod sa nasambit nga lugar.
Suno kay Roxas City PNP Information Officer Police Chief Master Sergeant Ramil Arcangeles, matapos ang insidente gilayon nga gindala sa isa ka pribado nga ospital ang biktima diri sa syudad sang Roxas apang ginsaylo ini sa Iloilo nga ospital bangud sa critical nga kondisyon.
Pahayag pa sini nga desidido ang pamilya sang biktima nga magpasaka sang nagakaigo nga kaso batuk sa suspek.
Sa karon ginahulat nalang ang resulta sang FESAGS Division kun may nagakaigo nga dokumento ang armas sang suspek kag kun wala mahimo ini pasakaan sang kaso nga RA 10591 ukon Comprehensive Firearms and Ammunition Regulation Act.
