ROXAS CITY – Arestado ang isa ka lalaki nga ginakabig Street Level Individual, matapos ang ginpatigayon nga buybust operation sang mga kapulisan sa Fortune Street, barangay Banica, Roxas City.
Ginkilala ang arestado kay alyas “Tangkad”, 34-anyos, kag residente sang New Road, barangay Banica, sining syudad.
Sa pagpakig-angut sang Bombo Radyo kay PLTCOL. Lumyaen Lidawan, Officer In Charge sang Roxas City PNP, ginpahayag nga ang nasambit nga persona ang ginapahayag yara sa likod sang pila ka nagakahinabo nga kinawatay sa syudad sang Roxas.
Dugang pa sini, nga magluwas sa pagpangawat, nagapatigayon man ini sang mga buluhaton nga ilegal kasubong sang pagbaligya sang ilegal nga droga kag armas luthang.
Mahibaluan nga nakuha sa paghinakop sini ang 4 ka sachet sang suspected shabu, P1,500 buybust money, 2 ka live ammunition, 1 ka unit sang .38 caliber revolver, 1 belt bag color black kag 1 pc. Pouch.
Samtang, magapangatubang sa kaso nga paglapas sa RA 9165 ukon Comprehensive Dangerous Drugs Act of 2002 kag paglapas sa Republic Act 10591 ukon Comprehensive Firearms and Ammunition Regulation Act may kaangtanan sa Omnibus Election Code (COMELEC Gun Ban) ang amo nga suspetsado.
Sa karon, yara na ini sa kustodiya sang Roxas City PNP para sa nagakaigo nga disposisyon.
