ROXAS CITY – Yara na sa estable nga kondisyon ang lalaki nga ginlabo sa Sitio Santo Niño, Barangay Baybay, Roxas City.
Ang biktima amo si alyas Rizos 47-anyos, samtang ang ginatudlo nga suspek amo si alyas Roy, 35-anyos kag lunsay mga residente sang nasambit nga lugar.
Sa interview sang Bombo Radyo kay Punong Barangay Erwin Oroceo, iya ginpahayag nga wala sang kamatuoran nga ginlabo sang suspek ang nasambit nga biktima.
Suno kay Oroceo nga nagpadulong sa puluy-an sang suspek si alyas Rizos nga yara sa impluwensya sang makahulubog nga ilimnon bitbit ang tubo kag didto nagsugod ang indi pag-intindihanay sang magtimbang nga bahin.
Natabuan man suno diri nga naga-inom-inom si alyas Roy kaupod ang iya mga abyan kag gintinguhaan niya nga sawayon ang biktima apang wala ini namati.
Sandig naman sa imbestigasyon sang kapulisan, ginapahayag nga nakit-an sang tupad balay sang biktima nga nagpauli ini nga duguon matapos nga gin-alegar ginlabo sang suspek.
Nag-angkon sang duha ka pilas sa agtang kag pilas sa nawala nga abaga ang biktima nga madasig naman nga gindala sa ospital kag yara na subong sa estable nga kondisyon.
Sa karon, ginahulat sang mga Barangay Official ang plano sang magtimbang nga bahin.
