ROXAS CITY – Ginbawian na sang kabuhi samtang ginabulong sa ospital ang 21-anyos nga lalaki matapos nga ginluthang sang wala matumod nga suspek sa Bayot Drive, Barangay 9, Roxas City.
Ginkilala ang biktima kay Edward Rolio alyas Bulldog sang amo nga lugar.
Base sa inisyal nga imbestigasyon sang kapulisan nga samtang nagainom ang biktima kaupod ang iya barkada nagdesisyon si alyas Bulldog kaupod ang abyan nga magabakal sang barbecue sa Roxas Avenue.
Pabalik na sila sang nagdesisyon nga magpangihi apang hinali lamang nga gintiro ang biktima sang wala makilala nga persona sakay sa iya motorsiklo.
Madasig nga nakapalagyo ang wala makilala nga suspek kag padayon nga gina-ayam sang kapulisan.
Narekober sa ginluntaran sang insidente ang lima ka mga empty shells sang .45 kalibre nga armas kag duha ka mga fired slugs sang amo man nga armas luthang.
Samtang, kalakip sa motibo nga ginhalinan sang insedente ang pagtimalos sang suspek sa biktima.
