Gintuad sang kapulisan nga madugay na nila nga gina-monitor ang 51-anyos nga lalaki nga nabaklan sang armas-luthang sa ginkasa nga buybust operation sang mga kapulisan Brgy. Dinginan, Roxas City.
Ini ang ginkumpirmar ni PCMS Ramil Arcangeles, tagpamaba sang Roxas Component City Police Station sang ma-interview sang Bombo Radyo.
Suno kay Arcangeles, pinaagi man sa impormasyon sang pumuluyo natigayon nga ma-monitor ang amo nga arestado nga nagahupot kag nagabaligya sang iligal nga armas-luthang.
Matandaan nga ginkilala ang arestado nga si alyas ‘Riano’, residente sang Barangay IX, sini nga syudad. Narekober sa arestado sa ginpatigayon nga buybust operation ang isa ka unit sang 12 gauge break type shotgun, nga may isa ka bala kag P3,400 nga buy bust money.
Magapangatubang ang nadakpan sa kaso nga paglapas sa Republic Act 10591 ukon Comprehensive Firearms and Ammunition Regulations Act Sa karon, nagapabilin ini sa kustodiya sang Roxas PNP para sa nagakaigo nga disposisyon.
