Gintutokan kag ginpalukpan sang armas luthang ang isa ka lalaki nga nagpark sang iya nga mortorsiklo sa atubang sang isa ka balay sa Barangay Poblacion, Mambusao Capiz.
Ginkilala ang biktima kay alyas “Nonoy” 55-anyos, samtang ang suspetsado ang ginkilala kay alyas “Toto”, yara sa legal nga pang-edaron nga lunsay mga residente sang nasambit nga Barangay.
Sa pagpakig-angut sang Bombo Radyo kay PCPT. Dennis Losbañes, hepe sang Mambusao Municipal Police Station ginpahayag nga samtang papauli na kun tani ang biktima halin sa birthday party sang iya nga abyan sang nagluntad ang mainit nga pagbinaisay sa tunga nila sang suspetsado.
Sa tion nga kuhaon na kun tani ni alyas “Nonoy” ang iya nga motor nga nakapark sa atubang mismo sa balay sang suspek sang hinali ini nga ginsita ni alyas “Toto” nga indi sini magpark sa atubang sang iya nga balay.
Didto kag nagluntad ang wala pag-intindihanay sa tunga sang duha kag hinali nga nagkuha sang pusil ang nasambit nga suspetsado kag gintutok sini sa biktima antes ini ginpalupok sa kahanginan sang makaduha ka beses.
Suno pa kay Losbañes nga wala naangtuhan ang natabo nga kinagamo rason nga wala madakpan ang nasambit nga suspetsado kag madasig ini nga nakasulod sa ila balay matapos nahimo ang krimen.
Samtang, narekober sa lugar ang bala sang caliber .45 pistol.
Sa karon, hilway sa karsel ang nasambit ang suspetsado samtang ginahulat pa ang desisyon sang pamilya sang biktima kun magapasaka ini sang kaso.
