Arestado ang isa ka lalaki nga ginakabig target sang kapulisan sa ginpatigayun nga buy-bust operation sa Barangay XI, Roxas City sang Nobyembre 12, 2025, matapos makabaton ang mga otoridad sang impormasyon parte sa iya mga ilegal nga aktibidad.
Sa impormasyon nga nagikan sa Roxas Component City Police Station, ginkilala ang akusado nga si alyas “Repredo”, nga una na nadakpan sang tuig 2017 kag napasakaan sang kaso nga alarm and scandal, bangud sa paghupot sang matalom nga bagay, kag R.A. 9165 ukon Comprehensive Dangerous Drugs Act of 2002, apang gin-dismiss ang mga kaso sang korte.
Suno pa sa ila, nakumpirmar nga madamo sang parokyano halin sa nagkalain-lain nga lugar ang nagakadto sa apartment sang suspek, kabangdanan nga ginpatuman ang operasyon para sa seguridad sang mga residente.
Nakuha sa iya posisyon ang 14 gramos sang ginapatihan shabu nga nagabalor sang masobra P90,000.
Sa subong,ginahulat na lamang ang pormal nga pagsaka sang kaso samtang yara sa kostudiya sang Roxas Component City Police Station ang akusado.
