Patay ang isa ka lalaki matapos bumunggo ang ginamaneho nga tricycle sa kasugata nga pick-up sa Barangay Mianay, Sigma, Capiz.
Ginkilala ang driver sang tricycle kay alyas “Mike”, 45-anyos kag residente sang Brgy. Dinginan, Roxas City samtang ang driver naman sang pick-up ang ginkilala kay alyas “Dariu”, 33-anyos kag residente sang Brgy. Pagbunitan, Sigma, Capiz.
Sa interview sang Bombo Radyo kay PCPT Mark Anthony Garcia, hepe sang Sigma MPS, ginapahayag nga samtang ginasubay ni Mike ang dalan sa Brgy. Mianay hinali nalang ini nga nadulaan sang kontrol sa ginamaneho sini nga tricycle bangud nakatapak sang stockpile rason nga ini ang bumunggo sa kasugata sini nga pick-up.
Bangud sa mabaskog nga impact, nag-angkon sang patal nga pilas si Mike sa magkatuhay nga parte sang lawas sini nga gilayon naman nga ginrespondehan sang katapo sang Sigma BFP kag Sigma ERT agud dapatan sang pauna nga pagbulong antes ginpadangat sa Dao District Hospital para sa nagakaigo nga pagbulong apang, makaligad ang pila ka oras gindeklarar ini nga wala na sang kabuhi.
Sa karon, yara na sa isa ka punirarya ang nasambit nga biktima samtang nag-settle naman ang magkatuhay nga bahin kag ginbaton nalang man sang pamilya kag himata sang biktima ang natabo sa iya.
