ROXAS CITY – Patay ang isa ka lalaki matapos naaksidente sa ginamaneho nga motorsiklo sa Sitio Ayuyan, Barangay Sto. Angel, Dumalag, Capiz.
Ginkilala ang biktima kay alyas Dan, 23-anyos nga residente sang nasambit nga lugar.
Base sa impormasyon nga nagikan sa Dumalag Municipal Police Station, samtang ginasubay sang biktima ang dalanon sakay sa iya motorsiklo nagikan sa Barangay Sto. Niño kag padulong kun tani sa Barangay Poblacion sa nasambit nga banwa, apang pag-abot sa ginluntaran sang insidente, ginapahayag nga aksidente ini nga bumunggo sa tinumpok nga balas kag bato sa karsada rason nga nadulaan ini sang kontrol sa pagmaneho.
Bangud sa mabaskog nga impact sa pagkabunggo, nag-angkon ini sang patal nga pilas sa ulo kag nagkalain-lain nga parte sang lawas.
GIlayon man nga ginrespondehan sang katapo sang Dumalag Response Team kag ginpadangat sa Dao District Hospital ang biktima para kun tani sa nagakaigo nga pagbulong apang gindeklarar nga dead on arrival sang doktor nga nag-atendir.
Samtang, ginkustodiya naman sang Dumalag PNP ang motorsiklo para sa nagakaigo nga disposisyon.
Sa karon, nagapadayon ang imbestigasyon sang mga kapulisan angut sa nasambit nga insidente.
