ROXAS CITY – Ginpalab-ot na sang lima ka mga punong barangay sa siyudad sang Roxas kay Capiz Police Provincial Office (CPPO) Provincial Director Police Colonel Julio Gustilo Jr. ang ila kagustuhan nga mapabalik ang mga kapulisan sa Barangay Cagay nga nagaserbe nga center post.
Suno kay Punong Barangay Reynaldo Afloro sang Barangay Balijuagan nga luyag kun tani nila nga ibalik sa Barangay Cagay ang center post bangud sakop na sa monitoring sang mga kapulisan ang lima ka barangay, kalakip na diri ang Barangay Cagay, Sibaguan, Dinginan, Balijuagan kag Talon.
Suno diri nga ila ginahinyo nga sa Barangay Cagay ang mas maayo nga center post bangud wala sang may magamit nga patrol ang mga kapulisan agud makapatigayon sang monitoring sa mga kaiping nga kabaranggayan.
Aminado si Afloro nga may yara sang apat ka mga kapulisan nga nakadeploy sa ila nga barangay apang indi ang mga ini maka-roving bangud wala sang patrol.
Suno kay Afloro nga kun sa Cagay ang mangin center post, may yara sang magamit nga salakyan ang mga pulis sa paglibot agud mapabilin ang kalinong kag katawhay sa lima ka mga barangay.
Ginkompirma ni Afloro nga sa karon wala sang kapulisan nga nakaduty sa outpost sang Balijuagan bangud wala pa sang budget ang nasambit nga barangay sa pagpatukod sang panibag-o nga outpost.
Nahibaluan sa mismo hepe sang Roxas City PNP nga si Police Lt. Col. Ricardo Jomuad nga ginakabig nga strategic place ang Barangay Balijuagan gani diri ginpahamtang ang outpost kag ini man ang nagaserbi nga exit kag entry point sang siyudad.
Ini man suno diri ang sandig sa mandato sang mismo alkalde sang siyudad.
