ROXAS CITY -Yara na sa kustodiya sang mga kapulisan ang lima ka mga suspetsado nga ginatudlo nagsulod kag nagpangawat sa isa ka apartment sa Washington Street Barangay VII, Roxas City.
Tatlo diri sa ila ang lunsay mga menor de edad samtang duha naman ang yara sa legal nga pang-edaron nga ginkilala kanday Ken Ramos kag Vince Joe Ofieza lunsay mga residente sang nasambit nga lugar.
Matandaan nga nagreklamo sa Roxas City Police Station si Irene Calvin matapos nga ginsulod kag ginkawatan ang ginarentahan sini nga apartment.
Nagalab-ot naman sa kapin 47 mil pesos ang kabug-usan nga nataban sang mga suspetsado.
Narekober naman sa mga suspek ang Laptop sang biktima.
Sa karun, nakahunong na sa karsel sang Roxas City Police Station si Ramos kag Ofieza samtang ang tatlo naman ka mga menor de edad ang ginturn-over sa Crisis Center.
