ROXAS CITY – Magasumiter sang isa ka resolusyon sa national Inter-Agency Task Force (IATF) ang League of the Municipalities in the Philippines (LMP) Capiz Chapter nga nagahinyo nga untaton anay ang pagpapauli sa mga Returning Overseas Filipinos (ROF’s) kag Locally-Stranded Individuals (LSI’s) sa probinsiya.
Ini ang ginkompirmar mismo ni LMP-Capiz Chapter President kag Mambusao Mayor Leodegario Jun Labao Jr. sang mainterview sang Bombo Radyo.
Ini bangud indi na halos masarangan sang mga local government units (LGU’s) nga akomodaron ang mga magapauli nga indibidwal ilabi pa nga indi naman mahimo gamiton ang mga eskwelahan bilang quarantine facility.
Mas maayo suno diri nga hulaton na lamang nga makapatukod sang kaugalingon nga real-time polymerase chain reaction (RT-PCR) testing laboratory ang lokal nga gobyerno sang siyudad sang Roxas kag probinsiya sang Capiz.
Pananglitan nga ara na ang amo nga mga pasilidad, mas mahapos na ang pagpapauli sa mga LSI’s kag ROF’s bangud madasig naman ang pagpaguwa sang laboratory results.
Wala malikawan ni Tapaz Mayor Roberto Nonong Palomar nga magpautwas sang iya nga pagkadismaya sa lihok sang gobyerno-probinsiyal sa kampanya kontra sa coronavirus disease (COVID-19).
Sa nasambit nga sinapol, ginpahayag ni Palomar nga may dako nga pondo ang gobyerno-probinsiyal gikan sa nasyunal apang kasubong indi ini sang preparado ilabi pa nga padayon nga nagadugang ang mga kaso sang nasambit nga sakit.
Aminado man ang alkalde nga nabudlayan sila nga mga alkalde sa pag-akomodar sa mga nagaalabutan nga Returning Overseas Filipinos (ROF’s) kag Locally-Stranded Individuals (LSI’s) ilabi pa nga wala ini sang koordinasyon sa ila.
