ROXAS CITY – Dead on arrival ang mag-iloy matapos nga iguon sang kilat alas 11 sang gab-i, Setyembre 13 sa sulod sang ila balay sa Sitio Agcagay, Barangay Bunga, Mambusao, Capiz.
Ginkilala ang mga biktima nga sanday Rochelle Ledesma, 35-anyos kag anom ka tuig nga bata nga lalaki kag residente man sang nasambit nga lugar.
Base sa inisyal nga imbestigasyon nga nasapwan na lamang sang ila himata nga wala na sang kabuhi ang mag-iloy samtang nagahigda.
Mahibaluan nga nag-ulan sa ila nga lugar nga may kalakip nga pagpanaguob kag pagkilat kun sa diin nakabangon pa si Rochelle para mag CR kun sa diin gintabunan pa sini ang ispiyo.
Apang, hinali na lamang nag naglupok ang outlet sang ila kuryente rason nga nag brown-out.
Wala naman nagalaom ang himata sang mga biktima nga iguon ang mag-iloy sang kilat bangud nagahigda lamang ang mga ini.
Samtang, nakibot na lamang sila sang ginpasigahan nila sang flashlight ang mag-iloy kag nakita nga nagahamyangon kag wala na sang kabuhi ang mga biktima.
Gintinguhaan pa nga dal-on sa ospital ang mga biktima apang wala na ang mga ini natabangan.
