Gin-athag ni Maine Mendoza nga madugay na siya nga naka-move on sa iya nga nabatyagan nga paghigugma kay Alden Richards sang kasagsagan sang ila nga tambalan nga “AlDub.”
Suno kay Maine, ang iya nga pahayag sa isa ka podcast sang Agosto 17 ang kabahin lamang sang paghanduraw sa Kalyeserye kag sa maragtas sang ila nga tambalan.
Sa nasambit nga podcast, gin-ako ni Maine nga na-inlove siya kay Alden sadto, apang wala siya ginpangaluyagan sang aktor apisar nahibaluan sini ang iya nga nabatyagan.
Suno sa iya, ginsiling ni Alden sa iya nga indi sini mapahayag ang matuod niya nga nabatgayag bangud nga madula ang “magic.” Matapos ang kontrobersyal nga pahayag, gilayon ini nga gin-athag ni Maine duha ka adlaw matapos ang episode.
Suno sa aktres-host, indi niya katuyuan nga liwat nga pasikaton ang isyu ukon ang tensyon sa tunga sang mga fans. Madumduman nga nangin kabahin sang Philippine entertainment ang tambalan nga “AlDub,” nga nagsikat sa isa ka noontime show nga halos isa ka dekada na ang nakaligad.
Sa kasikatan sang mga ini, napuno nila ang pinakadako nga arena sa pungsod para sa isa ka concert, kag tubtob sa karon may pila pa sa gihapon ang nagapati nga magadayunay sila nga duha.
Sa pihak sang indi pagpadulong sa matuod nga relasyon ang ila nga tambalan, nagapabilin nga mag-abyan si Maine kag Alden sa diin nga nagtambong pa si Alden sa ika-30th birthday ni Maine sang Marso. Si Maine Mendoza ang sa karon kasal na sa aktor kag Congressman nga si Arjo Atayde.
