Malacañang, nagpanawagan kay Senator Imee Marcos nga indi paghimuon lahog ang health condition ni President Ferdinand Marcos Jr.

Nagpanawagan si Palace Press Officer, Undersecretary Claire Castro nga respetuhon kag indi paghimoon nga lahog ang isyu sa ikaayong lawas ni President Ferdinand Marcos Jr..

Ini ang may kaangtanan sa pahayag ni Senador Imee Marcos nga nagasiling nga ‘uncared’  si President Marcos.

Suno kay Usec. Castro, indi angay nga himoon nga lahog ukon content ang paghatag sang advice sa tawo nga may ginabatyag nga sakit.

Pahayag pa niya, ang kinahanglan sang Presidente kag sang bisan sin-o nga may masakit amo ang matuod-tuod nga pagpalangga kag indi ang mangin isa ka ‘komedyante’ sa atubang sang publiko.

Ginpahayag man ni Castro nga indi dapat magpaka-plastik ukon gamiton ang isyu sang ikaayong lawas para lang makakuha sang simpatiya sang kadam-an.