Ginpahayag sang Malakanyang nga personal nga desisyon ni Vice President Sara Duterte ang indi pagtambong sa State of the Nation Address (SONA) ni Presidente Ferdinand “Bongbong” Marcos Jr sa Hulyo 28, 2025.
Ini ang sabat sang Palasyo sa reaksyon sa anunsyo ni Vice President Sara Duterte sa Kamara nga indi siya magtambong sa ika-apat nga State of the Nation Address ni Pang Bongbong Marcos sa Hulyo 28.
Suno kay Palace Press Officer Claire Castro, desisyon ni VP Sara kun indi niya luyag nga mabatian ang mga programa kag trabaho nga ginahimo sang Presidente.
Una diri, ginpahayag ni House Secretary General Reginald Velasco nga ginpahibalo sang opisina sang Bise Presidente ang mga opisyales sang gobyerno, diplomatic corps kag mga VIP guest antes ginpadala ang pormal nga imbitasyon.
Sa pihak sini suno kay Velasco, bilang protocol, maga-alokar sa gihapon sila sang pulungkuan para kay VP Sara sa tunga sang gallery ukon VIP gallery – magluwas sa holding room nga gintigana para sa iya kag sa iya mga tinawo.
Ini na ang ikaduha nga kahigayunan nga ma-skip ni VP Sara ang SONA sang PBBM matapos nga wala nakatambong sang nagligad nga tuig kag nagdesignar sang iya kaugalingon bilang “designated survivor.”
