PILAR CAPIZ – Pilason ang isa ka mangunguma matapos gintiro sang buga sang kaugalingon sini nga paryente sa Barangay Sante Fe, Pilar, Capiz.
Ginkilala ang biktima kay Ernie Vargas, 33-anyos samtang ang ginapahayag suspek ang ginkilala kay alyas “Kabog” yara sa legal nga pang-edaron lunsay mga mangunguma kag lunsay residente sang nasambit nga lugar.
Sa interview sang Bombo Radyo kay PMaj. Alfred De Leon hepe sang Pilar Municipal Police Station, ginpahayag sini nga may nagluntad nga pagbinaisay sa tunga sang biktima kag suspek.
Suno kay De Leon, hinali na lamang gintiro sang suspek sa dughan ang biktima gamit ang marble gun ukon “buga” nga madasig naman ginrespondihan sang katapo sang Municipal Disaster Risk Reduction and Management Office (MDRRMO) Pilar ang biktima agud hatagan sang pauna nga pagbulong antes ginpadangat sa pribado nga ospital.
Anay hiligut-anon ang ginalantaw nga rason sang kapulisan sa nagluntad nga insidente.
Base sa pahayag sang biktima indi na ini magpasaka sang kaso batuk sa suspek apang kinahanglan lamang sini nga bayaran ang nagastos sa ospital.
Panawagan ni De Leon sa mga Pilareno nga kun may mga problema indi pag-ipagi sa init sang ulo sa baylo hinalaan sang instakto agud masolbar kag indi na magresulta sa kaangay sini nga hitabo.
Sa karun, padayon pa nga ginapangita ang suspek matapos nagpalagyo matapos makumiter ang krimen.
