ROXAS CITY – Nagpalab-ot sang reklamo ang isa ka mangunguma nga plano sang ila Barangay Kagawad kag subong man presidente sang ila farmer’s organization nga buhinan sang tig-P300 ang ila pagabatunon nga P5,000 nga financial assistance nagikan sa Department of Agriculture (DA).
Suno sa tagreklamo, nga nagpatawag sang pagsinapol ang ila presidente nga si Brgy. Kgwd. Milagros Senita sang Pebrero 12 kag gin-istoryahan ang plano nga pagbuhin sang nasambit nga kantidad sa kada benepisyaryo, kag ang matipon nga kantidad ang pagatungaon sa mga wala nadala sa listahan.
Suno sa tagreklamo nga may pila ka mga mangunguma nga nagpasugot man apang ang iban ang indi magpasugot bangud nagapanindugan nga wala ini sa guidelines sang ahensya.
Nahibaluan nga wala madala sa 134 ka mga paga-releasan nga mangunguma ang nasambit nga tagreklamo apisar suno sa iya masobra 30-anyos na ini nga nagapanguma.
