ROXAS CITY, CAPIZ- Nagalab-ot sa 814 ka mga benepisyaryo nagikan sa Brgy. Adlawan, Roxas City ang nakabaton sang Family Food Pack halin sa Department of Social Welfare and Development (DSWD) kahapon nga adlaw, Oktubre 23, 2025.
Sa interview Bombo Radyo kay Punong Barangay Roberto Ross Roldan, iya ginpahayag nga ang mga benepisyaryo ang maid-id nga gin-validate antes ginpasa sa ang profile kag mga rekoritos sa DSWD agud nga mahimo nga makabaton sang tig-P10,000 magluwas sa food packs.
Suno kay Roldan, ginalauman niya nga may magalain ang buot nga mga residente, apang gintul-id niya nga ang ila paglista ang wala sang pinilian kag pakolor-kolor. Ang mga benepisyaryo ang nag-fill-out sa Disaster Assistance Family Access Card (DAFAC) kag nagpasa sang iban pa nga kinahanglanon nga dokumento.
Pahayag nya, pagkatapos sang pag-ulan gilayon nga nag-inspeksyon ang mga Tanod kag BHW sa ila barangay kag natumod ang labing-naapektuhan sang lapnagon nga pagbaha, gani kumpyansa ini nga tuman nga naapektuhan ang yara sa lista.
Samtang, sa nasambit nga pagpanlista, wala ini nagpangayo sang picture bilang ebidensya nga ginbaha ang mga biktima, magluwas nalang suno diri sa duha ka totally kag tatlo ka partially damage nga balay.
Mensahe sang natungdan sa mga pumuluyo nga iya nasakupan, ginahimo nila ang ila nga mga obligasyon sa barangay sang patas kag wala sang pinili-ay.
Interviewed by Bombo Sunnie Mae Constantino Batencila
