PANAY, CAPIZ- Personal nga nagpadulong sa Barangay Magubilan, Panay, Capiz ang alkalde sang nasambit nga banwa agud usisaon ang sitwasyon sang pagkatiphag sang river control nga nagresulta sa pagkaguba sang ila nga dalan.
Sa interview sang Bombo Radyo kay Mayor Sonny Besa sang nasambit nga banwa, iya ginpahayag nga sa ila nga pagpadulong, diri kag ila nasapurahan nga dako gid ang natiphag nga bahin sang river control sa diin nga nagtuga ini sang problema sa mga residente.
Suno kay Besa, ang nabilin nalang nga mahimo maagyan sang tawo yara nalang sa ginabulubanta 15 inches ang kalapad kag maskin motosiklo delikado nga makaagi.
Pahayag nya, nakighinun-anon na sila sa Barangay Officials kag gin-istoryahan ang may kaangtanan sa pag-ubra sang temporaryo anay nga dalan nga mahimo maagyan sang mga pumuluyo sa diin nga ginaplanuhan nila nga ihingyo sa isa ka tag-iya sang uyapad sa amo nga bahin nga tambakan anay sang duta ang iya nga ulumhan agud nga himuon sang dalan.
Ginsiling man ni Besa na pananglitan indi magsugot ang tag-iya sang amo nga uyapad, pagabutangan nalang anay nila ang kilid sang natiphag nga dalan sang mga sandbag samtang ginahulat ang mga masunod nga tikang sang 1st District Engineering Office nga nagpadulong man sa amo nga lugar.
Ginpasigurado naman ni Besa nga pagalagson nila ang contractor sang nasambit nga proyekto agud nga mapasabat kag kun mahimo ipaliwat ang amo nga proyekto bangud nga sulod pa ini sa warranty.
Intervieqwed by Bombo Francis Biñas
