ROXAS CITY – Gilayon nga nagdihon sang tikang ang alkalde sang Ivisan matapos mahibaluan nga positibo sa red tide ang kalalawran nga sakop sang Barangay Cabugao kag Basiao sa ila banwa.
Sa interview sang Bombo Radyo kay Hon. Felipe “Ipe” Yap, Mayor sang Ivisan, iya ginsiling nga gikan sa water sampling nga ginpatigyon sang provincial agriculturist ang resulta nga may presensya sang organismo nga nagadala sang red tide.
Suno kay mayor, gilayon niya nga gin-abisuhan ang iya pumuluyo nga maglikaw anay sa pagkaon, pagbaligya, pagharvest kag pagtransport sang nagkalain-lain nga sahi sang panginhason nga ba-se naman sa nauna nga public advisory sang provincial government bilang precautionary measure.
Ginmanduan niya ang Ivisan PNP nga magmonitor sa merkado publiko kag talipapa sa ila banwa agud masiguro nga mauntat ang pagbaligya sini.
Ginpaandaman man sang kapulisan ang mga shellfish vendors nga untaton ang pagbaligya kag pagakumpiskaron ang mga baligya kun magpadayon.
Nagapasalamat ini bangud sa adlaw nga ginpauntat niya ang pagbaligya, nagsunod man ang mga vendors.
Natalana nga magbisita ang alkalde sa mga apektado nga lugar agud matsekyar niya suno diri ang kahimtangan sang pumuluyo.
Posible naman nga cash for works ang igabulig sini sa mga apektado ilabi na ang mga manginginsda kun sa diin magatrabaho ang mga ini agud mahatagan sang ayuda.
Ginsiguro sang opisyal nga handa ang mga emergency responders sa ila banwa pananglitan magakinahanglan sang bulig.
Sa karon, nahulat sini ang resulta sang meat sample nga ginpatigayon sang BFAR central office samtang ginapanawagan niya sa mga pumuluyo nga sundon ang gin-abiso sang Capiz provincial government para sa segurdad sang tanan.
