ROXAS CITY – Wala ginpaslawan ni Mayor Jomarie Openiano sang Cuartero ang iya mga pumuluyo sa sulod sang 100-diyas nga pagpungko.
Suno sa alkalde, sumugod sa una nga adlaw sang iya pagpungko naka-facilitate na siya sang mga programa gikan sa nasyunal kapareho sang Dole Tupad kag cash for work sang DSWD, may napa-bid na sila nga project gikan sa DBM nagabalor P10 milyon nga gina-implemetar na sa karon sang contractor, P13.5 milyon para sa proyekto nga farm to market road concreting sa Brgy. Mainit pakadto sa Agnaga nga gikan naman ang pondo sa Financial Aid to Local Government Unit (FALGU).
Samtang sa munisipyo padayon nga ginakay-o ang ila elevator, crystalized room, kag ongoing man ang ila AICS assistance para sa mga indigent nga nagapangayo sang bulig.
Nagapadayon sa karon ang completion sang senior citizens building kag gin-aprubahan na ang annual investment plan para sa kabarangayan kag civil society organization.
Gintuad sang alkalde nga sa iya pagpungko nangin masanag ang ila plaza.
Nagapasalamat man siya nga maayo ang koordinasyon sang mga opisyales kag empleyado apisar naga-adjust palang siya sa munisipyo.
Kampante si Mayor Openiano nga nahimo niya ang mga prayoridad sa Cuartero sa sulod sang 100-diyas.
Ginasiguro sini nga mahimo niya tanan ang iya plano ilabi na ang mga farm to market road kag mensahe sini sa pumuluyo nga mapabilin niya ang iya maayo nga batasan kag idiritso ang progreso sa Cuartero.
